Babaen ti pinangidaulo ni Mayor Maximo Cajigal, nagbalin a natalna, napintas ken naragsak ti ili iti Badoc. Daytoy a panagdur-as ket nagun-od babaen ti panangibabaet ni Apo Sta. Maria, La Virgen Milagrosa de Badoc ken ti Patron iti ili a ni San Juan Bautista kasta met iti panagkaykaysa dagiti umili.
Iti laeng uneg ti dua a tawen ken innem a bulan ket adun ti nagapuanan ti Baro A Badoc. Iti kangrunaan a sinolbar ti administrasyon ket dagiti kaso a mainaig iti illegal nga droga kasta met ti pannakatagiben ti linak ken talna. Idi tawen 2015, umabot ti 117 ti bilang iti crime volume, ita nga tawen bimmaba ti bilang ket agdagop laengen ti 56 segun ti kamaudian a datos.
Ita a tawen, nangilatang iti administrasyon iti P 640,000.00 a pondo para iti scholarship program. Kasta met a naidonar dagiti lote a pagpatakderen ti school buildings. Dagiti saan nga sakup ti Special Education Fund (SEF) nga pagkasapulan ti pagadalan ket inikkan tulong iti agdama nga dministrasyon.
Agtultuloy ti pannakaipaay ti Social Pension kadigiti senior citizens. Inadaptar ti local government unit (LGU) ti Centenarian Law ket nangibudgetda ti Php 20,000.00 kada centenarian a kas nayon ti ited ti gobyerno nasyonal. Aggapu ti pundo ti SEF, naikkan ti honorarium dagiti Child Development Workers ti gatad ti Php 300.00 kada bulan. Naipatakder met ti National Child Development Center nga agserbi para kadagiti umili. Nagbalin a frontliners dagiti opisyales iti tiempo ti layus, bagyo ken ania man a pagkasapulan ti naalisto a desisyon.
Naisayangkat dagiti farmers’ trainings tapnu ad-adda pay a mapaadu ti apit a pagay, mais ken natnateng. Naited iti barbarangays dagiti tractors, back pack sprayers, fertilizers, water hose, jetmatic pumps ken dadduma pay a naggapo iti pundo ti Tobacco Excise Tax a gatad ti RA7171. Kasta met nga babaen iti tulong ti Bureau of Aquatic and Natural Resources (BFAR) ken iti Mariano Marcos State University (MMSU) ket nangrugin ti seaweeds production and processing dagiti umili. Naipaayan pay ti vegetable seeds dagiti mannalon ken naisayangkat ti livestock vaccination kadagiti naduma-duma a dingwen. Kasta met a naipaayan dagiti naduma-duma nga barangay ti pagpurga kadagiti taraken a baka ken nuang a napunduan ti Php100,000.00. Mamentenar met a nalaing iti fish sanctuary kasta met a naipaayan pay ti tilapia fingerlings dagiti agtagikuwa ti fish cages.
Agtultuloy ti libre nga Tour Guiding Training Program para iti amin a mangayat a makipagpaset babaen ti Municipal Tourism Office. Kasta met a mapasayaat ti libre a Tourism Awareness Training and Programs tapnu iti kasta ket umuneg pay ti pannakaawat dagiti kailian tayo ti kaipapanan ti turismo ta daytoy ti maysa a kalakaan nga pagsapulan ken maaddaan ti kababalin dagiti tattao nga agsapul. Kangrunaan a prayoridad iti agdama nga administrasyon ti pannakatagiben ti linak, urnos, ken talna kasta met ti pannakatagiben kadagiti tourism sites iti ili. Maibilang pay ti pannaka mentenarti kinadalus ti aglawlaw. Agtultuloy pay dagiti programa a pannakabiag kadagiti napipintas a kannawidan ni Badoqueño.
Babaen ni Mayor Cajigal ken ti panangtarabay ni Association of Barangay Councils (ABC) President Virgilio Calajate, nagbalin a nagasat iti agdama nga administrasyon ta iti inda panagtugaw nga agserbi ket napasamak dagitoy a milagro—pannakakorona ni La Virgen Milagrosa ken ti pannakaital-o ti simbaan a Basilica Minore. Daytoy ken mangitunda tapnu mapauneg pay ti pammati dagiti taga Badoc kenni Apotayo.
Nu kasta nga agtultuloy ti inda panagakem kas opsyales, maitultuloy to ti pannakatagiben ti linak ken talna, pannakasemento dagiti saan pay a nalpas a barangay roads nu pay maanayen a bilang dagiti nasementon, pannakapaitakder dagiti pagtagilakuan para kadagiti small businesses, ken kasta pay ti capability building trainings para kadagiti empleyado ti LGU tapno nasaysayaat ti inda pinagtrabaho.
Masaluadan ken matagiben dagiti nagapuan ti Baro a Badoc tapno agtultuloy iti pannakapadur-as iti ili ken agbalin a lugar a maipagtangsit iti siasinoman, natalged, natalna ken naragsak a pagnaedan dagiti agdama ken sumarsaruno a henerasyon. (REA)