Naimbag a damag para kadagiti deboto ni Apo Santa Maria.
Naaprobaranen ti panagbalin ti St. John the Baptist Church iti ili a Badoc a kas basilica minore.
Inbunannag mismo daytoy ni Bishop Renato Mayugba iti nasapa a paset idi Disiembre. Narambakan iti maysa a misa iti panagyaman idi Dis. 27.
Mainaig iti daytoy a pasamak, dakkel a suporta ti naggapo kadagiti umili nga idadaulwan ni Mayor Maximo Cajigal ken ti panangtarabay ni ABC President Virgilio Calajate tapnu magun-odda daytoy a gagem. Dakkel a tulong daytoy iti itantandudo ni Gobernadora Imee Marcos ken ti gobierno probinsial nga agbalin a kabbaro a destinasion iti ili para iti “faith tourism”.
Iti baet daytoy, kinuna ni Municipal Tourism Officer Mr. Cesar Jade Raquel a kadagitoy pay laeng a gundaway ket namnamaendan a dayuen dagiti turista ti ilida a kas iti panagdudupudop dagiti deboto iti Our Lady of the Most Holy Rosary idiay Manaoag, Pangasinan.
Ni Mrs. Josephine Prieto Calajate, Ilocos Norte Provincial Treasurer, ti nag-Hermana Mayor idi coronasion pontifical ni Apo La Virgen Milagrosa de Badoc idi Mayo idi napan a tawen. Naiget iti pammati na nga aglaplapunosan dagiti bendision ken grasia a maawat pay iti ili ti Badoc ken dagiti amin a deboto nu agtultuloy a papigsaen iti debosion ken ni La Virgen Milagrosa nga isu a patron iti Probinsia iti Ilocos Norte. (REA)