No suratek ti biagko: kastoy
Napno iti utang iti kinaimbag
Napno iti pannakadillaw
Tiltilennak ti pannakaitublak
Dagiti pannakapaay, no dadduma
Pannakaumsi itoy a kinasiasinok
Dagiti panagkatangkatang
Da west, da nort, da est, da saut
Dagiti adu a kasaor ken dugudog
Ti panawen, dagiti panawen
Itoy agrikrikus a planeta.
No iladawak ti biagko: kastoy
Addaan isem: napait-naalsem
Ngem iti likudanna: nasam-it
Dagiti katawa ken garakgak
Iti aklili ti pasugnod ken
Pasidumri, uray dagiti aglemlemmeng
A panagsangit
Adda iliw, adda segga
Kadagiti saan nga agpabatubat
Nga awis umel a komunikasion.
No timbangek ti biagko: kastoy
Kalawakaw, mabalin pay a bukaw
Dagiti eppes a namnama a napaay
Adda waw, saan a kaasi, saan a danum
Isuda ti ayat, isuda ti kinnaawatan
Saan ketdi a panagpuor
Wenno panagrebba ti rangtay
Ti ayat dagiti dumaldalinesnes
A gagar: itan, naglikudandan
Ti ruangan a sinangpetan iti yuuli
Iti laem a nagsagrapan
Iti naimnas a ridep dagiti
sardam ken parbangon
Dagiti napasnek a panagbirok
Iti kasilpo ti biag.
Umaddangak latta, wen
uray adda sugat
Dagitoy sakak magnada iti daga
Uray dapan dapan; uray sakasaka
Ti panagdaliasat ta umayto
Ti pannakaimbirna iti ungto
Ti uged dagiti naituding
A darikmat; umayto
Iti nalamiis a malem
Siakto dayta ti biagko a mabatik.
siak ni Angkuan Deppa
ditoy barukong adda allangogan
tilirika ti kansion ken rima ti daniw.
Amado I. Yoro
(Naadaw iti Ditoy Tapao, Sinait, Ilocos Sur:Dagidagi Iti Kinasiak, panid 26. Inurnos ken inlayout ni Myra Yoro Madayag-TJ ken nangdesinio iti cover page)