Ni Leonardo Rosqueta Agonoy
MANGRUGRUGIN ti binnara,pinnalapal, pinniltak iti lubong ti politika. Idi punganay ti puon ti historia iti kasta a pakasaritaan ti politika ditoy Filipinas. Iti agdama, maituloy latta ti saan a nasayaat a kababalin dagiti politikotayo a dangdanggayan dagiti adda iti likudan dagiti politiko.
Nasaknap, nangruna iti agdama a panawen, ti panagsaknap ti fake news ken nadumaduma a kita ti panagpipinnadakes dagiti politikotayo. Am-amang pay a segsegpen ti sangapagilian iti panagbalbaliw koma metten ti di nasayaat nga ugalitayo, kakailian.
Iti biang ti nasional ti pangarigantayo laengen, kakailian. Ub-uboren, palpalapalendan ti narnuoyan iti bunga, isu dayta ti sigud a Senador Ferdinand “Bongbong” Marcos, Jr. Permi ita ti panangpadpadakes dagiti kontra-Marcos. Panggep pay ketdi ti nadunaduma a grupo a pa-disqualify ti COC ni BBM gapu kadagiti kaso a bibiagen manen dagiti mabuteng iti posible a panagsubli ti Marcos idiay Malacanang. Banag a saan la idandaneng ti kampo ni BBM. Kasta met dagiti supporters ti Marcos. Kunada a gapu kadagiti pammadpadakes dagiti kasupangil ti politika ni BBM, imbes nga aglidem ti ladawanna iti imatang ti publiko, saan, ta ad-adda ketdi nga agrimat, aglatak ken umad-adu ti makipagrikna ken ni BBM. Ta pudno met ngamin, adda gapuna a padaksenda ni BBM ta kasta ngarud ti narugit a sistema dagiti dehado a kasupangilna. Nakalawlawag, kakailian: kasano a ma-disqualify ni BBM manipud iti nadunaduma a kaso a nakairamanan ti naganna? Idinto a nagkandidato a senador iti kallabes. Nangabak. Idi napalabas a presidential election, nagpaidasig a para-bise presidente. Dimmanon iti korte ti election protest-na pay gapu iti maatap a pannakasuitik ti butosns a puon ti nakaabakanna ken ni Leni Robredo.
Isu a ti mapaspasamak iti agdama, kakailian, mamati dagiti agpalpaliiw a desperate move laeng ti ar-aramiden dagiti kasupangil ni BBM iti politika. Madlawda nga adu ti gundaway daytoy nga isunto ti mangsublat iti takem ni Presidente Rodrigo Roa Duterte.
Wen, a. Apay koma a palapalenda ngamin ti saan a nabunga a kayo? Idinto a ni BBM, narnuoyan ti bunga, isu nga adu ita ti nakasagana a nangpalapal kenkuana iti tay-ak ti politika a pagrimrinatan ti nadalus a ladawan ken kinataona.
Ala, kakailian, agridam, agsiputtayo ngarud. Panawen ita ti adu a panaggiinnulaw, pammadpadakes. Nangruna iti biang ti politika.
