Adda dagiti nangidanun kadakami nga adu dagiti mabul-bully kadagiti pila ti tricycle iti ciudad ti Laoag, pasahero man wenno saan. Inbatadda a narway dagiti driver a mangbasto-bastos kadagiti aglugan ken aglabas. Naari ken naturayda, no kasta.
Nagbalin met ngaminen a "little kingdom" dagiti traysikelan dagiti pila isu a maararamidda lattan dagiti kaykayatda. Malaksid iti mangbully, agpilida pay ti pasahero ken agsingirda iti nakangatngato a plete, puera delos buenos.
Ditay ammo no dagitoy ngamin pila ket intuding ti ciudad wenno bukbukod lattan nga inaramid dagiti driver. Permi a nagadun dagiti "little kingdom" iti Laoag ta sakupenda pay nukuan ti gudua't kalsada.
Adda koma ngarud round-the-clock a mangmonitor kadagitoy, kas iti pannakabantay kadagiti pila iti Manila. Adda koma pay dagiti asideg a pagreklamuan iti sentro ti ciudad, ta nakaad-adayo met ngamin ti traffic division ken PNP station.
Narway dagiti maaw-awatmi a message, appo, a mangibisbislin kadagiti reklamoda. Ala, sapay koma ta masolusyunan ti ciudad dagitoy a problema, tapno saan a maibagbaga nga "untouchable" dagiti traysikelan gapu iti botosda.
***
Mayat siguro a no agluganka iti tricycle iti ciudad ti Laoag, mangisaganaka ti bassit a placard a nakaisurat ti "ASIDEG LA'T PAPANAK NGEM AGPLETEAK TI P30" ta isu't isarangmo no agsadaka. Nalabit nga al-alisto ka a makaala ti tricycle ken nadayaw pay nukua ti driver.
***
Masansan ngamin, ti laeng paginteresan dagiti maseknan ket dagiti makunkuna a "big laws". Saandan nga ikankano ti implementasion dagiti "small laws". Saanda a maamiris a ti rason a masapul dagiti "big laws" ket gapu ta nabaybay-an dagiti "small laws".
***
Iti sabali a bangir, nagbalin nga issue itay kallabes ti basic grammar ken sentence construction. Dikam nagun-uni ta saankam met nga eksperto kadagita a banag. Masansan nga inel-el met ti panagsuratmi.
Ngem dua a banag ti naadalmi iti daytoy nga issue: presentation ken substance. Masapul nga umno ti presentation wenno form tapno saan a nalibeg ti panagsurat. Iti sabali a bangir, uray kasano't kinalibeg dagiti balikas, ti importante ket addaan daytoy ti anag. Ngamin no maminsan, agdepender ti kaipapanan ti naisurat iti interes dagiti agbasbasa. Uray kasano't kinaperpekto ti sinurat no saan nga interesado dagiti reader, awan latta't mamaayna. Uray met kasano't kinadorgi't panagsurat no interesado dagiti agbasbasa, bestsellerlatta ti arigna.
Ngamin, ti biag ket saan a kanayun a classroomken saan met a kanayun nga ig-igid ti kalsada. Ti biag ket nalaga a classroomken igid ti kalsada a mangsapsapuyot iti nadumaduma a dana.
***
BARD NOTES: Happy bard-reading to Badoc ABC President Virgilio Calajate, Ilocos Norte Provincial Treasurer Josephine P. Calajate, INEC President Enrico Ruiz, INEC Director Joseph Vergel P. Calajate, Provincial Agrarian Reform Program Officer II Vic M. Ines, DAR Chief Administrative Officer Rudy Acacio, Ms. Genedine Domingo Jambaro and PNB Pasuquin Branch Manager Metty V. Guerrero.
Greetings also to the employees of JVC Consortium, AMA Laoag, Ilocos Norte Regional School of Fisheries, Laoag City PNP, DAR Ilocos Norte, DepEd Laoag, DepEd Ilocos Norte and PNB Pasuquin.