Ania? Kalikaguman dagiti traysikelan ditoy Laoag a nangatngato koma ti plete iti rabii ngem iti aldaw? Apay at-atiddog ti rukod ti kilometro iti rabii no maikumperar iti aldaw? Apay nanginngina kadi met ti singir dagiti jeepney, van, minibus, bus, tren, barko ken eroplano nga agbibiahe iti rabii? Ken maysa pay, uray awan pay paglintegan, nabayagen nga inpangato dagiti traysikelan ti Laoag ti plete, aldaw man wenno rabii. Puera delos buenos!
***Nakasusuron ti "estilo bulok" dagitoy tricycle driverno makitada a maymaysaka a sumungad iti pila. Agintatawagda iti cellphone, agin-uurnosda iti uneg ti sidecar wenno "harap-harapan" a pagpipinnasaandaka.
Isu a maymayat sa ketdi nga ipakattayo met kadakuada ti aramidda. No agintatangkenda, natangken met ti takdertay kadakuada! No bastosda, tapkalantay met ti bastos a purwa! No nakaritda, ikarittay met a mabalintayo a patiliw ida!
Saantayo a pakigkigtot kadakuada. Datayo koma ketdi ti mangkigtot kadakuada. Saantayo a palanglanggong ken pairurumen kadagiti traysikelan. Laglagipentayo, datayo ti pagsapulanda. isu a rumbeng a dayawen ken respetarenda tayo. Ta no nadayawda, respeto met ti maalada a subad manipud kadatayo.
Spoiled ngamin dagitoy traysikelan, puera delos buenos. Pinagbalinda payen a "little kingdom" da dagiti pila. Basol met la dagiti agtuturay no apay a nagbalinda a birrurukong! Sapay koma ta adda mapasamak a milagro tapno madisiplinaanda a nasayaat. Ken sapay koma ta adda mairugi nga alternatibo a transportasion tapno maputed met ti ipos dagiti rinuker a traysikelan!
***
Mangipan koma ti Laoag City government ken Laoag City PNP kadagiti "passenger complaint desk" iti sentro ken dadduma pay a strategic area ditoy Laoag. Dagitoy a complaint desk ket isu koma ti mabalin a pagreklamuan dagiti biktima dagiti abusado a traysikelan. Adayo ngamin unay ti ayan ti Traffic Division, apo, ta agarkilaka pay laeng ti tricycle tapno makapanka. No adda dagiti passenger complaint desk, as-asideg ti pagpasalakanan, ad-adu dagiti mangtaming kadagiti reklamo ken mabalin a matiliw a dagus dagiti violator. Suhestionmi lang, apo!
***
Appo a taga-city hall, pakikitayo man dagita stores dita abagatan ti Ilocos Norte National High School. Nagadu dagiti aggu-ummong a menor de edad nga agsisigarilio dita uray bigbigat. Nakalalasin met ngarud a kappultit dagitoy nga agpapayubyob. Natinggar kanon dagitoy a pagtagilakuan itay kallabes gapu iti maipagarup a panaglaklakoda ti sigarilio, ngem kasla awan nagnaan ti pammalagip kadakuada. Ne, kitaenyo a nasayaat, amangan ta adda met protektorda!
***
BARD NOTES: Happy bard-reading to Badoc ABC President Virgilio Calajate, Ilocos Norte Provincial Treasurer Josephine P. Calajate, INEC President Enrico Ruiz, INEC Director Joseph Vergel P. Calajate, Provincial Agrarian Reform Program Officer II Vic M. Ines, DAR Chief Administrative Officer Rudy Acacio, Ms. Genedine Domingo Jambaro and PNB Pasuquin Branch Manager Metty V. Guerrero.
Greetings also to the employees of JVC Consortium, AMA Laoag, Ilocos Norte Regional School of Fisheries, Laoag City PNP, DAR Ilocos Norte, DepEd Laoag, DepEd Ilocos Norte and PNB Pasuquin.