Iti kada eleksyon, saan koma laeng a dagiti kandidato ti mabutusan. Maikkan koma pay dagiti umili ti gundaway a mangpili ken mangbutos kadagiti kangrunaan a programa ken proyekto a rumbeng nga ipatungpal dagiti mabutusan nga opisyal. Ngamin, no panagkakampanya, nagadu ti kari dagiti kandidato. Ngem no maelektarandan, dagiti kaykayatdanto man lattan ti sangsanguenda. No dagiti umili ti mangpili kadagiti kangrunaan a programa ken proyekto a masapul a maipatungpal, mapilitan dagiti opisyal a mangimplementar kadagitoy, pabor man wenno saan iti bukodda a partido.
***
Agpayso kadi nga adda maysa a konsehal iti lugartayo a sabali ti ob-obraenna iti rabrabii, nangnangruna no mabartek? Mapan kano nukua dita sentro ti ciudad ti Laoag nga agapro-apros kadagiti tricycle driver ken lallaki a tambay. Ket no permi a typena kano, tawaranna iti PHP300 tapno maiyawid wenno maipanna iti motel. Ne, no agpayso daytoy a naipadanun kadatayo, nakababain daytoy a konsehal! Rumbeng a maobserbar ken makastigar! Siputanyo man, kailian!
***
Dita met grocery ti Robinsons Ilocos, adu dagiti makaobserbar nga agtsitsismis ken agpipinnorma dagiti dadduma nga empleado. Naruay a customer ti masuron ta irapin pay dagitoy nga empleado ti aggiinnarem, idinto a nagatiddog ti pila iti cashier ken baggage counter. No met agungetka, kasla isuda't mairurumen unayen. Kitaen koma daytoy ti management ta permi a makaperdi’t aldaw!
***
Kamaudiananna, adtuy man ti 5 a nagkakauna a pammati seknan kadagiti ar-aria:
1. No iti rabii ket agtagtaguog iti nabayag ta asom, alaem ta mukatna samo iyaprus kadagita matam. Ket makitam ti ar-aria nga inna tagtaguogan. PARIKUT—No ngarud awan mukat diay aso?
2. No inyaw-awannaka ti sansilmo, baliktadem ta badom tapno masarakam ti pagawidam. PARIKUT—No ngarud nakauyos wenno awan badom idi ta masansilmoka? Ania't baliktadem?
3. Adda ar-aria iti paraangam no aggu-ummong ti adu a kulalanti iti maysa a pasetna. Ta dagiti kulalanti ket paggugusto a taraknen dagiti di-katawtaw-an. PARIKUT - No ngaruden pagkamalian dagiti di-katawtaw-an a kulalanti dagiti bisti a Christmas Lights iti Diciembre?
4. No agmaymaysaka ket kellaat a sumgar dagiti dutdotmo, adda nakatakder nga ar-aria iti likodmo. PARIKUT—No ngarud nakaeddaka, pagtakderan diay ar-aria?
5. No agmanmanehoka iti lugan ket lumabaska iti lugar a maibagbaga nga adu't ar-aria, agbusinaka tapno saan nga agunget dagiti ar-aria. PARIKUT—Saan ngata a lalo nga agunget dagiti ar-aria no makigtotda iti panagbusinam?
***
BARD NOTES: Happy bard-reading to Badoc ABC President Virgilio Calajate, Ilocos Norte Provincial Treasurer Josephine P. Calajate, INEC President Enrico Ruiz, INEC Director Joseph Vergel P. Calajate, Provincial Agrarian Reform Program Officer II Vic M. Ines, DAR Chief Administrative Officer Rudy Acacio, Ms. Genedine Domingo Jambaro and PNB Pasuquin Branch Manager Metty V. Guerrero.
Greetings also to the employees of JVC Consortium, AMA Laoag, Ilocos Norte Regional School of Fisheries, Laoag City PNP, DAR Ilocos Norte, DepEd Laoag, DepEd Ilocos Norte and PNB Pasuquin.