Laoag City—Pagsayaatan dagiti mannalon ken dagiti babassit a negosiante ti ipangpangruna ni Ilocos Norte Vice Governor Angelo Marcos Barba para iti nabunga ken agtultuloy a panagserbina iti publiko.
Daytoy ket babaen ti panangipaay ti nagduduma nga ayuda a kasapulan dagiti mannalon ken panangpabulod iti kasapulan a pagpuonan dagiti babassit a negosiante ditoy probinsia.
Ni Vice Governor Barba ti immunan a nagibunong kadagiti nagduduma nga ayuda ken ramit a kasapulan dagiti mannalon tapno adda ti nayon nga usarenda.
Malaksid iti daytoy, timmulong ti bise gobernador tapno maisagana ken maipasa dagiti kasapulan a gakat tapno maipatungpal ti programa a panangipaay ti pagpuonan kadagiti gagangay a negosiante tapnon kabaelanda ti makilaban iti napigsa a kompetision.
Malaksid iti pagsayaatan dagiti mannalon, ti bise gobernador ti mangiyal-alikaka ti pagsayaatan ken pannakapreserbar ti aglawlaw.
AMBag sa Kalikasan
Pinasingkedan ni Vice Governor Angelo Marcos Barba (AMB) ti pannakabukel ti “AMBag sa Kalikasan” (My Contribution to Nature), a mangitantandudo ti pannakigamulo dagiti umili kadagiti maisaysayangkat a cleanup activities ken panangliklik iti panagusar ti single-use plastic.
Nakipaset ti Office of the Vice Governor (OVG) iti National Cleanup Day idi Setiembre 29-30. Idi met Oktubre 6, 2018, kaduada ti Movement Against Plastic Pollution (MAPP) – Ilocos Norte, Sirib Ilokano Kabataan Association (SIKA) Inc., Liga ti Agtutubo Managayat ti Barangay (LAMB), Sangguniang Kabataan (SK) ofisiales ti Seguindo Distrito ti Ilocos Norte, ken dadduma pay a grupo dagiti agtutubo ken pribado nga indibidual.
Paset ti “AMBag” ket ti pannakaibunong ti reusable “eco-bags” kas pananggutigot kadagiti umili a saanen nga agusar pay kadagiti produkto a naaramid iti plastic.
Idi Agosto ti napalabas a tawen, nangipababa ni AMB ti memorandum a mangimplementar ti “No Single-Use Plastic Policy” iti opisina ti bise gobernador ken iti Sangguniang Panlalawigan.
“The use of single-use utensils, plastic bottled drinks, and food wraps during meetings and celebrations shall be avoided,” kuna iti paset iti nasao a memorandum.
“Disiplina laeng ti masapul a buyogantayo iti panagayat iti aglawlaw,”kuna ni Barba a mangnamnama a maituloy daytoy a rinugiananna, nangruna kadagiti sumarsaruno nga agserbi iti OVG ken SP. (EJD)