Ditoy Laoag ti nakaipasngayanmi. Ditoy metten ti inkam dimmakelan, wen apo, dimmakkelkam met bassit.
Numan pay adda dagiti gundaway a pinanawanmi ti Laoag gapu iti adal ken trabaho, inyaddang latta dagiti sakami ti agsubli ditoy “sunshine city”.
Isu nga intay man padasen nga iladawan dagiti dadduma a nagbalbaliwan ti bukodtayo a ciudad.
Irapintay metten a lagipen dagiti sigud a pagbutbutngan a lugar ditoy Laoag a nagtaudan dagiti naduma-duma nga istorya maipanggep kadagiti di-katawtaw-an.
***
5 a naggidiatan ti napalabas ken agdama ditoy Laoag:
1. Idi, mabain dagiti tao nga agibelleng iti kalsada uray wrapperlaeng ti kendi. Ita, adun dagitay awanan disiplina a mangibakal lattan iti kalsada kadagiti basurada.
2. Idi, dagiti pedestrian lane ket nawada a pagnaan dagiti pada a magmagna. Ita, dagiti pedestrian lane ket nagbalinen a garahe dagiti trak ken pilaan dagiti traysikelan.
3. Idi, no agbatangtang ti kampana para iti orasyon iti malem, agsardeng dagiti lugan. Ita, uray saan nga orasyon, agsarde-sardengen dagiti lugan gapu iti nakulkol a taray ti trapiko.
4. Idi, mabuteng dagiti traysikelan nga agsalungasing iti linteg ta baka tulpaken ida dagiti adda iti turay. Ita, dagitin agtuturay ti mabuteng kadagiti traysikelan, nangnangruna no umadani ti panagpipili.
5. Idi, no adda bisyo dagiti agtutubo, ilemmengda. Ita, nagadun nga agtutubo ti mangipangas pay ti kinamammartek ken panagpayubyubda iti publiko.
***
Malaksid kadagiti kamposanto, dagitoy man dagiti kabutbutengmi a lugar idi ukenkam pay lang. Sumagmamano kadagitoy ti awan itan.
1. Ines Building—Dakkel a pasdek a naaramid iti radrilyo. Dati a nakatakder iti igid ti McKinley St. Ibagbagada idi nga adda aggigian a kapre iti paraanganna. Aggammat kano ti ubbing.
2. Home Economics Building ti Northwestern College—Pasdek iti Lagasca St., asideg iti dati a Fire and Ash. Dua ti ibagbagada nga agparparang ditoy idi: white lady ken ikamen nga agalun-on ti tao.
3. Padsan River iti tengnga’t aldaw wenno rumabii—Iti tengga't aldaw ken sumipnget, mabalin nga agparang kano kenka ti sirena iti karayan. Pagilasinan nga addan ti sirena ket no nalangsi ti aglawlaw a buyugan ti naisangsangayan a kanta ti maysa a babai.
4. La Tabacalera iti laud ti Kapitolyo—Uray ita ket nakabutbuteng pay laeng ti langana. Ngem idi ubbingkami, ibagbagada nga adda dagiti agsikawsikaw nga ar-aria dagiti soldado a hapon iti rabii.
5. Grotto iti amianan ti St. William Cathedral—Kunada nga adda agparparang a black lady ditoy, nangnagruna iti sumipnget. Ti ammom kano ket nakamangisit laeng a baket a nagitugkel kandela. Ngem no talyawennaka, makitam a lussok dagiti matana.
P. S. Mabalin a pamutbutengda laeng dagitoy idi kadagiti ubbing. Ngem ditay met ketdi ammo no pudno. Dakayo, ania met dagiti kabutbutengyo a lugar idi ubbingkayo? Malaksid iti banyo no pagdigosennakayo ni inangyo
***
BARD NOTES: Happy bard-reading to Badoc ABC President Virgilio Calajate, Ilocos Norte Provincial Treasurer Josephine P. Calajate, INEC President Enrico Ruiz, INEC Director Joseph Vergel P. Calajate, Provincial Agrarian Reform Program Officer II Vic M. Ines, DAR Chief Administrative Officer Rudy Acacio, Ms. Genedine Domingo Jambaro and PNB Pasuquin Branch Manager Metty V. Guerrero.
Greetings also to the employees of JVC Consortium, AMA Laoag, Ilocos Norte Regional School of Fisheries, Laoag City PNP, DAR Ilocos Norte, DepEd Laoag, DepEd Ilocos Norte and PNB Pasuquin.