Ti kararag ket isu ti kangrunaan nga igamtayo iti panagbiag. Isu’t dalan ti pannakagun-od kadagiti ar-araraw ken kalikagumtayo.
Ngem saan nga amin nga iyareng-engtayo babaen ti kararag ket matungpal. Adda dagiti saan a maikkan ti sungbat gapu ta saan a maikanatad dagiti linaunda.Intay man pagsasangnguan ti listaan dagiti kararag a saan nga umno. Itartarustay metten a pagraramanan dagiti naduma-duma a misteryo iti panagbiag
***
5 a kararag a saan nga umno:
1. Apo, ikararaganmi man dagiti tsimoso ken tsimosa. Sapay koma ta pagbalinem a kimmot dagiti ngiwngiwatda, nga agungap laeng no umiblengda. Tapno imbes a sabali a tao ti inda mirmiraen, dagiti laeng bukodda a bangsit ti maang-angotda.
2. Apo, ikararaganmi man dagiti traysikelan a saan nga agilugan ti maymaysa. Sapay koma ta no nasursurok ngem maysa ti pasaherosda, bumtak amin a ligay ken matukkol ti sidecar ti tricycleda. Kasta koma, Apo, agingga a masursuroda ti mangrespetar kadagiti pagbibiaganda a pasaheros.
3. Apo, ikararaganmi man dagiti managsigarilyo iti publiko. Sapay koma ta umun-unada nga agrunot ngem dagiti nutnutnutenda. Sapay koma ta umun-unada a maibus ngem ti nagyan ti maysa a pakete ti sigarilyo. Ta kakaasi met, Apo, dagiti paypayugpoganda a saan nga agsigsigarilyo a mairamraman a madaddadael ti salun-atda.
4. Apo, ikararaganmi man dagiti agpatpatnag nga agvid-videoke. Sapay koma ta matilmonda ta mirkopono a pagir-iryakanda uray matmaturogen ultimo dagiti padada a mangmangkik. Sapay koma ta no kada panagdesintonadoda, alun-unen ida ti mismo a videoke machine. Tapno maanalisarda a makaistorbo ti bosesda a kaasping ti agkikiak a kuriat wenno agpaparaw a bullfrog.
5. Apo, ikarkararaganmi man dagiti PTA (Pirak Ti Apoda). Sapay koma ta sinsilyo laengen ti mailasinda a kwarta, tapno makitada ti kinababa ti balor ti buwaya a kinataoda. Ket no ikaryoda latta ti agakup ti sangabantay a sinsilyo, daytoy koman ti manggabor ken manglemmes kadakuada.
P. S. Saan nga umno dagitoy a karkararag, apo, ta kayarigandan ti lunod. Ngem mabalin met nga ikabesayo for emergency purposes. Ta saan met a dagiti naadat a balikas ti denggen ti Namarsua, no di ket dagiti sansaning-i ti puso nga agsagsagaba.
***
5 a misteryo ti biag:
1. Apay ngata? No siasinno pay ti istambay, isuna pay ti kadaklan labay.
2. Apay ngata? No siasinno pay ti kaadduan naganab, isuna pay ti addaan reklamo a maitarabitab.
3. Apay ngata? No siasinno pay ti adda iti babaen, isuna pay ti pumorma a kasla diodiosen.
4. Apay ngata? No siasinno pay ti agkasapulan tulong, isuna pay ti dumayamudom.
5. Apay ngata? No siasinno pay ti managparabur, isuna pay ti maipuor.
***
Ala kastan, kailian. Agkikitatayto manen inton umay a lawas para iti sabali pay a bansada dagiti listaan ti panagbiag. Dios ti agngina!
***
BARD NOTES: Happy bard-reading to Badoc ABC President Virgilio Calajate, Ilocos Norte Provincial Treasurer Josephine P. Calajate, INEC President Enrico Ruiz, INEC Director Joseph Vergel P. Calajate, Provincial Agrarian Reform Program Officer II Vic M. Ines, DAR Chief Administrative Officer Rudy Acacio, Ms. Genedine Domingo Jambaro and PNB Pasuquin Branch Manager Metty V. Guerrero.
Greetings also to the employees of JVC Consortium, AMA Laoag, Ilocos Norte Regional School of Fisheries, Laoag City PNP, DAR Ilocos Norte, DepEd Laoag, DepEd Ilocos Norte and PNB Pasuquin.