Ni Elizabeth M. Raquel
Contributor
Laoag City—TI awankadagiti dadduma nga ili ket adda iti ili a Currimao. Ti adda kenkuana ket ti kaadda ti rocks a porpormaen dagiti dalluyon agpapan ita, maysa a nakaskasdaaw a mapaspasamak iti nasao nga ili.
“Nakaskasdaaw ti idadakkel dagiti rocks,” kinuna ti maysa a residente iti asideg ti kadilian. “Kasla milagro ti ar-aramiden dagiti dalluyon a pagsidsiddaawanmi a residente iti Brgy. Pangil.”
Saan met a mailaksid iti imatang dagiti opisial ti ili a Currimao maipanggep iti “rock formation” ti kadilian iti Brgy. Pangil, Currimao, Ilocos Norte. Kinunada a maysa daytoy a makuna nga “eco-tourism” nga ad-adda a mangawis kadagiti turista nga umay mangkita iti nasao a “coral rocks formation”.
Maigapu iti daytoy, nangipasa ti konseho ti Currimao ti maysa nga ordinansa a mangipakaammo a ti Coral Rock Formation iti Brgy. Sentro ken Brgy. Pangil iti Currimao ket maibilang a nakaskasdaaw daytoy a mangitag-ay ti eco-tourism programti ili a Currimao.
Dinakamat pay ti nasao nga ordinansa ti pannakaporma ti working committee a mangkita ken mangsaluad dagiti igid ti baybay nangruna iti Brgy. Sentro ken Brgy. Pangil a pakasarakan ti Coral Rock Formation.
Idauluan ti agdama a mayor ti Currimao, Hon. Gladys Go Cue, chairperson, ti nasao a working committee, co-chairperson ti bise mayor ket buklen dagiti kamengna dagiti Sangguniang Bayan members, Currimao police chief, MAO, dagiti barangay chairperson ti Brgys. Sentro ken Pangil, municipal tourism officer, municipal treasurer, municipal budget officer, ken NGO representatives.
Natipkel ti koordinasion ti nabukel a working committee babaen iti panangiwardas ni Mayor Go-Cue. Kinunana a ti Coral Rocks Formation ti napigsa a pangawis kadagiti turista nga umay mangimatang. Maysa pay a pangawis ti ili a Currimao kadagiti turista ket ti Tambora Festival agraman ti nadalus a danum ti baybayna.
“Kayatko a mairakurak ti Coral Rocks Formation iti amin a paset ti Filipinas,” kinuna ni Mayor Go-Cue.
Ania ngarud pay ti aramidenyo? Mapankayo a dagus idiay Currimao, Ilocos Norte tapno makitayo ti naisangsangayan a pangawis ti Currimao nga isu ti Coral Rocks Formation nga awan sabali a mangtubtubay no di dagiti dalluyon.