Awan ti nataengan wenno ubing iti nagan ti panagserbi a boluntario. Dua a nataenganen a padamin a limmas-ud iti payapay ti pitopulo, ti nagkuna iti nagduma a kapanunotan—umuna: Nataenganakon, awanak ditan, bagiyo metten; maikadua: Addaakto latta aginggana ti kabaelak ken ipalubos ti salun-at, bagi ken panunotko iti rummuar ken makidanggay iti agus ti biag. Makipagtunos. Makikaykaysa. Mangted ti panawen. Kasta ti naawatanmi iti kinuna ti maikadua. Nalpasakon. Panawenyo metten. Didak ibibiangen. Kasta met ti nagawatak iti kinuna ti umuna.
Ania kadagitoy ti pangipuestuantayo ti bagitayo.
Adda dagiti dadduam a kalpasan a nakaawatdan ti nangato a pammigbig kas ‘kangrunaan a pammadayaw’. Agsardengdan!Adda met dagiti dadduma, sige, ala latta. Addada latta a makidangdanggay, no dadduma isuda ti mangidaulo ken mangiwanwan.
Adda sumagmamano nga am-ammomi ti nagkuna: “Adda man ken awan ti plake wenno sertipiko ti pammadayaw, saandak a mapasardeng nga agaramid iti mabalinko nga aramiden a patiek a pakairanudan ti sabali.”
Agree. Ta iti panagboluntario, aramid a nawaya a tiempo, nawaya a panunot, awan ti namnamaen a supapak.
In my Stewardship Book, The Spirit of Giving: Volunteerism, Stewardship of Time, page 10“Volunteerism is an act of doing things for others. Volunteer is a person who gives free time for the benefits of others, gives services without any expressed or implied promise of remuneration. Giving is a labor of love.” Boluntario ngarud.
Adda agkuna kaniak, kasano no I get injured or get into an accident. Simple answer: volunteer at own risk. No dayta ti tubeng nga umayka, bukodmo a decision daytan, kabsat. Ti makunak laeng: annad ti ultimo nga annad.
Iti pammatimi, no agkaykaysa ken adda panagtutugmok ti pampanunot dagitoy a mangisakad ti masnop a proyekto, agpapada dagitoy a makatulong a mangpadur-as ti komunidad babaen iti panagtitinnulong ken panagkaykaysa iti maysa wenno ad-adu pay a masnop nga isyu a mangitag-ay ti gandat ken panggep ti gunglo.
Kas iti OFCC: “to promote and perpetuate the Filipino cultural heritage; to help unite all Filipino organizations for the common welfare of the Filipino community; to encourage all Filipinos to develop a strong sense of responsibility in a greater participation for the betterment of the Filipino community in the island….”
Sika a mismo nga akimbagi ti mangikeddeng ti kayatmo nga aramiden iti gimongmo. Aramid a boluntario daytoy. No mangtedka ti tiempom, wenno aramidem ti pagrebbengam kas umili. Adda nagkuna kadakami no apay nga ad-adu dagiti nataenganen nga agserserbi iti gunglo. Apay kano nga awan ti gundaway dagiti agtutubo wenno ub-ubbing tapno matubayda nga agserbi.
Pudno man ken saan ti pammaliiw daytoy a kabsat, ti ammomi ket nawaya ti asino man a sumrek ken makitipon. Adda maysa a taripnong a nagsarita dagiti makuna a youth, agtutubo, kaaduanna ti local, kaaduanna ti bugas ti saritada ket mangdillaw ti kita ti gunglo, bickering, crab mentality, ken old-fashioned leadership style.
Wen pudno, wen saan a pudno dagiti inagapadda. Ti makunak: apay nga ita laeng a maluktan ti matana, maluktan ti lapayagda?
Iti OFCC, adda naituding a paset dagiti agtutubo a makipartisipar, maibatay iti bylaws, adda standing committee Task Force on Youth: “to encourage youth to become active and shall coordinate all youth programs….” Saanka pay a naladaw agtutubo, umaykan, umaykayon. If you really care, come on in! The opportunity is NOW, very timely: we need progressive change.
Maysa a madlaw no apay nga ad-adu ti ‘nataengan’, ipagarupmi: nawaywayada iti panawenda kalpasan ti panagretiro. Nupay maibaga a natennebdan iti padas, Kayatna ti agnanayon a panagsursuro a mangipaneknek a saanda a maudi kadagiti agkabannuag wenno agtutubo—inaldaw nga ibilang dagitoy a nataengan a ti panagadal ket awan ti patinggana.
Adda pagsasao: no agsardengkan nga agsursuro, kasla met insardengmon ti umaddang. Iti biangmi, kas maysa a sakupen ti 70 agpangato, saan iti kapaut ti biag ti pakarukodan, ti pakarukodan ti maysa a tao ket ti kalidad ti serbisiona iti kagimonganna.
Itoy a gundaway, saluduanmi dagiti nataengan a padamin nga adda iti 62 agpangato. Awan kadakami ti petsa a pannakayanak dagitoy ngem iti patangmi, uray diak nagan ti nagankon no awanda pay ti 62 agpangato. Jesse Pascual, Al Sabangan, Rose Sabangan, Art Abinsay, Boni Manuel, Maria Etrata, Conrad Abuel, John Witek, Hermie Gaspar, William Gaspar, ken dadduma pay.
Kadagiti napalabas a kombension wenno miting ti OFCC, adda latta ni Jake Manegdeg a no tawen ti pagsasaritaan, natenneben, no aktibo ti pagsasaritaan, isu ti maysa kadagiti sumagmamano a lider a makaited pay laeng ti panawenna. Nagpresidente iti UFCH 1976-1977; 1978-1979, nagkomisionado iti dua a Centennial Commission. Ambassador Juan C. Dionisio Lifetime Achievement Awardee-UFCH. Agdama a presidente iti Filipino American Citizens League.
Adda met ni Mrs. Pacita Saludes, a presidente a nangiturong ti Gumil Hawaii sipud idi 1971. Damo a gunglo a nagkamenganmi.
Iti gimong dagiti babbai, mairaman a kaaktibuan da Maggie Domingo, Cirvalina Longboy, Maria Etrata, Carmen Cabreros, Lina Mercado, Veronica Esteban, adu pay.
Saluduanmi met dagiti agtutubo, agkabannuag nga adda latta a makapulapol iti community service kas kada Angie Santiago, Leo Gozar, Eleanor Bru, Luz Peirson, Isabel Rivera Phu, Roger Tapat, Rexie Tuzon, Loida Yamamoto, Armi Farinas, Davelyn Quijano, Gus Concepcion, Helen Go, Maria Cristina White, Cesar Bonilla, Jimmy Iloreta, Richard Borromeo, Calvin Bagaoisan, Vanessa Pulido, ken dadduma.
Saan met nga agpalpalikud dagiti dadduma a pasado a presidente ti OFCC iti miting man ken aktibidad. Adda metten OFCC Council of Past Presidents sipud 2012: Danny Villaruz, chairman, Amado Yoro, vice chairman; Jean Jeremiah, recorder, addada met da: Ilalo Parayno, Jun Abinsay, Ernie Pascua, Edith Pascua, Ben Cabreros, Eddie Agas, Sr.. Cirvalina Longboy, MaggieDomingo, Herman Gerry Rojo, Franklin Borromeo, ken dadduma pay.
Itay kaudian a panagsapata ti OFCC officers and directors “A Year of Renewal” ti tema. Saan a gapu ta nalpasdan ti takem, iti nagan ti panagserbi- isu ti panagserbi, adda dagitoy da: Ernie Pascua, Amado Yoro, Franklin Borromeo, Cirvalina Longboy, Maggie Domingo, Maria Etrata, Lynne Gutierrez, Ben Cabreros, ken Eddie Agas, Sr.
Marunggay trimming—cutting dead branches ti bugas ti mensahe ni Rev. Alex Vergara. Masairak koma ta kasla ketdin iti kinapauten ti kaadda a makipulpulapol sipud 1971, ket no sabali a panangdengngeg, dakami metten, kasla kadiayen. Ngem apay ketdin a masairak ket patiek met ti bagik, saanak pay met nalaylay a sanga ti marunggay. Saan met a pangbagkat ubet—we still can make a difference and deliver a positive result.
Awan ti makapada iti suot, sapatos ken talugading wenno saguday ti maysa a lider. Adda bukod nga estilo tunggal maysa. Ti pagdiligen isu ti resulta dayta a liderato.
Saan a kas dadduma, puera delos buenos. Nagan laeng ken titulo.
Maysa pay a pammaliiw: adda dagiti nagsubli manen kalpasan a napaut nga awanda. Maysa a rason a makita, kayatda ti umay agpaliiw, agsubli a makilangen, umayen ti eleksion, ti masaludsod: yanmo kadagiti panawen ti panagtrabaho wenno kunatayo a panaglangoy iti kaadalman a taaw iti nasabrak a bagyo ti biag.
Adda pagsayaatan ti lumned-tumpaw a kunada. Ngem patienmi a nasaysayaat nga amang ti makuna a ‘taginayon’ wenno masansan. Kas iti aginaldaw a panagsagrap ti taraon iti dulang. Ammom ti mapaspasamak iti uneg ti kosina. Umayka kadi manen gapu ta adda kayatmo. Wenno umay agdillaw. Botos kadi laeng, titulo, puesto.
Kombension manen ti OFCC ken UFCH iti Hunio ken Hulio. Nawayaka nga umay a makipagserbi, mangabak wenno maabak iti eleksion. Dayta ti kita ti boluntario a panagserbi iti komunidad a salsaluduanmi. Adda man ken awan ti posision iti liderato, iti panagserbi ti nasken nga ipakita iti agkuyog a sao ken aramid.