Saan a nakapapati ngem pudno! “Untouchable” dagiti traysikelan ditoy ciudad ti Laoag!
“Nalabes kay unay nga agsarita”, mabalin a kunayo. Ngem padasenyo a sintiren ti garaw dagiti tricycle driver. Makitayo nga adu dagiti buong ti ulo nga abusado ken bastos!
Ngem iti likod ti binunton a reklamo dagiti pasahero, kas man awan opisyal a makaitured a mangipursigi ti umno a pannakadisiplina dagiti traysikelan. Awan ti makaitured a mangsagid kadakuada! Ala, aguni dagiti makaitured!Addan sa ketdi bukod a paglintegan dagiti traysikelan, ta dagiti laeng kaykayatda ti ipakpakatda iti pannakatratar dagiti pasahero, panagpila ken uray pay iti estilo dagiti sidecar.
Isu nga intay man pagraramanan ti listaan dagiti “misteryo” dagiti tricycle sidecar iti lugartayo.
Kalpasanna, intayto pagsinamit daytoy naputarmi a listaan dagiti “10-year challenge”.
***
Lima a “misteryo” maipanggep kadagiti sidecar dagiti tricycleditoy Laoag:
1. Apay ngata a no ngumato ti plete kumsen met dagiti sidecar?
2. Apay nga ipapilit ti adu a tricycle driver a saan a nababbaba ngem dua ti pasaheroda kada byahe idinto a nganngani maysa laeng ti malaon ti sidecarda?
3. Apay a ti plastar ti tugaw ti adu a sidecar ket kapilitan a malislis ti palda dagiti babbai? Naigagara kadi? Namuna ta adda sarming nukua iti abay ti motor.
4. Apay ngata nga adu dagiti sidecar nga awanan ti silaw wenno reflector? Banag a mangit-itedda ti puon ti disgrasya iti pasetna ti rabii wenno parbangon.
5. Apay ngata nga awan pay nangngegko a konsehal ti Laoag a nangputar ti ordinansa a mangkorehir kadagitoy? Mabutengda ngata a mapukawan botos?
P. S. No nagkamaliak ta adda gayamen konsehal a naggandat a mangkorehir kadagitoy, despensarenyo. Sapay koma ta adda!
***
Lima a “10-year challenge”:
1. Tay kari ni peboritmo a pulitiko sangapulo a tawenen ti napalabas, natungpal kadin?
2. Tay kinatsismosa tay karrubam, nagbaliw kadin kalpasan ti sangapulo a tawen?
3. Tay kinasadot tay kaopisinaam, napukaw kadin kalpasan ti maysa a dekada?
4. Tay utang kenka ni pagayammo idi 2009, nabayadanna kadin?
5. Ta waistlinemo, bimmassit kadin kalpasan ti sangapulo a tawen a minalemmo a panagzumba?
***
Ala, dagita man pay laeng ti isagpawtayo iti daytoy a lawas. Padaanan ti sabali pay a bansada dagiti listaan nga inkam idasar inton umay a lawas! Dios ti agngina, kailian!
***
BARD NOTES: Happy bard-reading to Badoc ABC President Virgilio Calajate, Ilocos Norte Provincial Treasurer Josephine P. Calajate, INEC President Enrico Ruiz, INEC Director Joseph Vergel P. Calajate, Provincial Agrarian Reform Program Officer II Vic M. Ines, DAR Chief Administrative Officer Rudy Acacio, Ms. Genedine Domingo Jambaro and PNB Pasuquin Branch Manager Metty V. Guerrero.
Greetings also to the employees of JVC Consortium, AMA Laoag, Ilocos Norte Regional School of Fisheries, Laoag City PNP, DAR Ilocos Norte, DepEd Laoag, DepEd Ilocos Norte and PNB Pasuquin.