Lima.
Numero a saan unay a dakkel ngem saan met unay a bassit. Masansan, daytoy ti bilang a kaus-ustuanna laeng. No ad-adu ngem lima, agbalin a makasuya. No met nababbaba, amanganta nakurang ti anagna.
Kas iti panangibislin kadagiti kapanpanunutan, no nasursurok ngem lima ti ilimogmo, agtungpal a makaulaw. No met nababbaba ngem lima, agtungpal a kawaw.Iti daytoy nga isyu, intay rugyan a pagraramanan dagiti naduma-duma a putarmi a listaan dagiti “lima” – dagiti listaan a mabalin a pagsarmingan.
***
Lima a rumbeng nga aramidem no adda buhaw iti asidegmo:
1. Mangsarakka ti natibker a pagkaptam tapno saannaka a maipurwak ti alipugpogna.
2. Umadayoka kadagiti nalaka a marpuog wenno matumba. Amanganta matupakanka no mawagwag dagitoy gapu iti kinapangasna.
3. Saanmo nga ikankano ni buhaw. Ngamin no madlawna nga adda “audience”, ikarkarona ti panagpug-awna.
4. Saanmo a dengdenggen dagiti puyotna. Amanganta sumgar dagita dutdotmo ket mapasubsubam isuna. Sika laeng ti agbalin a dakes.
5. No narigat a talaga nga isnaben ti kinapang-awna, pumanawka laengen. Saanen a tao dayta.
Nalugananen ti dakes nga espiritu ti ottot ni demonyo.
***
Lima a pagsasao seknan kadagiti uleg:
1. Mangawis ti talek sakbay a pumalek.
2. Isem ti putan ti katademan nga immoko ni manglimlimo.
3. No para kenkuana, alisto a makalusot. Ngem no para iti sabali, adu’t parikut.
4. Sharing a sharing iti sango seknan ti ebanghelio, managtagibassit met no nakalikod ti tao.
5. Amin a balasubas, nasam-it nga umarasaas.
***
Ania’t makunayo, kailian? Agannad kadagiti buhaw ken uleg. Agkaiwara manen dagitoy a dorgi, nangnangruna ta umadanin ti panangpipili. Ala kastan, ad-adunto pay a listaan ti intay pagsasangnguan iti sumaruno nga isyu.
***
BARD NOTES: Happy bard-reading to Badoc ABC President Virgilio Calajate, Ilocos Norte Provincial Treasurer Josephine P. Calajate, INEC President Enrico Ruiz, INEC Director Joseph Vergel P. Calajate, Provincial Agrarian Reform Program Officer II Vic M. Ines, DAR Chief Administrative Officer Rudy Acacio, Ms. Genedine Domingo Jambaro and PNB Pasuquin Branch Manager Metty V. Guerrero.
Greetings also to the employees of JVC Consortium, AMA Laoag, Ilocos Norte Regional School of Fisheries, Laoag City PNP, DAR Ilocos Norte, DepEd Laoag, DepEd Ilocos Norte and PNB Pasuquin.