Sarindaniw
Amado Yoro
Senario Uno: panangrugi ti panagsana
Ala, anusam Angkuan Deppa
Kutkotem ti kadaratan igid ti sabangan
Mangimuntarka ti dalikan ken karaang
Isamiram latta a kuroban ti kadaratan
Pakaurnongan ti masagat a danum baybay
Itakom ti sudo wenno sabot ti niog
Yallatiwmo iti sinublan wenno siliasi
A paglutuan ti aramidentayo nga asin.
Kiwar, ala, kiwarem pay
Agburbureken ti nasagat a danum
Iti kinuroban a kadaratan
Kasta ti biagtayo nga agsansana iti
igid ti baybay iti sirok ti kalapaw
karuantayo ti agaramid ti asin
imbag la nga intayo imaro
iti kaarrubatayo a barbario
dagiti sitio ken purok
asin ti nabirtud a rekado
pakbet man, dinengdeng wenno inabraw
paimasenna la ketdi ti pammigat, pangaldaw
ken pangrabii man
Nabannog kadin dagiti agsansana iti sabangan
awanen ti rangen ti anawang ken
karaangda nga agpaburek iti nasagat a danum
nabannogda kadin kadagiti panagpuyat
iti kaltaang ti rabii
Natamnayen dagiti lutuenda a pinakbet ti kinakisang ti asin iti sagumbida
insaluketdan dagiti aklo iti kamalig;
napakleb kadin dagiti sinublan ken siliasi
iti suli ti abong abong- adda mangeg nga urok
nabannogan a nagkiwar iti pannakasisi
dagiti arig kristal nga asin
piman ni agsansana
impaklebda payen ti alludan ken bigao
iti laem ti abong abong
awandan iti dalan a mapan makimaro
iti kaarruba a barangay
iti inggudua, kaka; insubor, kabsat
uray bagas, nateng, mabalinen a kasukat ti asin.
(adda tuloyna)