Ni Amado I. Yoro
Ewa, Hawaii
Adda anniniwan ditoy
ditoy kadaratan mapukawda met laeng
kas kadagitoy a tugot, saanda nga agtalinaed ditoy
saanda a taga ditoy
ganggannaetda iti apagdarikmat
iti panagmaymaysa
a panagbirok iti kinaasino
iti lansad ti barukong adda ulimek iti kararua
dagiti dalluyon a dumuprak ken maburak
denggen ti kanta ti angin
saan nga agtalinaed ti dalluyon iti kadaratan agsublisublida a kas met iti anniniwan a
lemmesen ti dalluyon
punasen ti dalluyon dagiti tugot iti kadaratan
awanan nagan a pakasaritaan
inton agtabon ti init
agtabonto metten ti anniniwan
iti awan naganna nga ipapanaw..
[MANIPUD ITI PANAGMAYMAYSA KEN PANNAKAIPUSING]